Barqaror Rivojlanish Maqsadlari Kontekstida Hududiy Tabaqalashtirilgan Kambag'allikni Qisqartirish Siyosati

Maqolada Barqaror rivojlanish maqsadlarining birinchisi (BRM-1) va «hech kimni ortda qoldirmaslik» tamoyili nuqtai nazaridan mintaqa ichidagi tengsizlik muammosi Buxoro viloyati misolida tadqiq etiladi. 2025 yilda viloyat bo'yicha kambag'allik darajasi 5,7 foizga tushgan bo'lsa-da, tumanlar kesimida u 2,9 foizdan (Buxoro shahri) 10,4 foizgacha (Shofirkont tumani), ya'ni 3,6 baravar farq qiladi. 13 ta ma'muriy-hududiy birlik ma'lumotlari asosidagi regression tahlil o'rtacha ish haqi kambag'allikning asosiy omili ekanini ko'rsatdi (R² = 0,862): ish haqi 100 ming so'mga oshganda kambag'allik 0,29 foiz punktga kamayadi, elastiklik –2,0 ga teng. «Temir daftar» qamrovi kambag'allik bilan kuchli korrelyatsiyaga ega (r = +0,869), biroq ish haqi nazorat qilinganda uning mustaqil ta'siri ahamiyatsiz, ya'ni u natija emas, manzillilik indikatori hisoblanadi. Shu asosda tumanlar kambag'allik va ish haqi darajasiga ko'ra to'rt tipologik guruhga ajratildi va har bir guruh uchun farqlangan siyosat taklif etildi: yuqori qo'shilgan qiymatli va kreativ tarmoqlar, hunarmandchilik va turizm, kasb-hunar va mikrokredit, periferik hududlar uchun klaster yondashuvi hamda hududiy brending. Bunday tabaqalashtirish yagona andozadagi dasturlarga nisbatan resurslardan samaraliroq foydalanish imkonini beradi.